Seminari Teknik i Rrjetit Evropian të ISSA-s në Tiranë
Në datat 16 dhe 17 shtator, në Tiranë u zhvillua Seminari Teknik i Rrjetit Evropian të ISSA-s, me temë “Forcimi i shërbimeve në skemat e pensioneve – Përmbushja e nevojave të personave të moshuar”, organizuar nga Instituti i Sigurimeve Shoqërore (ISSH), në bashkëpunim me Shoqatën Ndërkombëtare të Sigurimeve Shoqërore (ISSA).
Në aktivitet morën pjesë drejtues dhe përfaqësues të institucioneve të sigurimeve shoqërore nga 20 vende evropiane, të cilët ndanë përvoja dhe praktika lidhur me modernizimin e shërbimeve, digjitalizimin dhe përshtatjen e skemave të pensioneve me nevojat në ndryshim të qytetarëve.
Dita e parë e punimeve
Në ditën e parë të seminarit, diskutimet u përqendruan në forcimin dhe modernizimin e shërbimeve në skemat e pensioneve, me fokus të veçantë te përmbushja e nevojave të personave të moshuar.
Sekretari i Përgjithshëm i ISSA-s, z. Marcelo Abi-Ramia Caetano, dhe Presidenti i Rrjetit Evropian të ISSA-s, z. Yunus Elitaş, vlerësuan ISSH-në për mikpritjen dhe organizimin e aktivitetit, si dhe Shqipërinë për hapat e ndërmarrë në drejtim të modernizimit të shërbimeve.
Në fjalën e saj, Ministrja e Ekonomisë dhe Inovacionit, znj. Delina Ibrahimaj, u ndal te reforma e pensioneve në Shqipëri, duke theksuar rëndësinë e qëndrueshmërisë financiare, thjeshtimit të shërbimeve dhe përshtatjes së skemës me ndryshimet demografike.
Në vijim, Zëvendësministrja znj. Olta Manjani dhe ekspertët ndërkombëtarë trajtuan rëndësinë e transformimit digjital të shërbimeve, duke nënvizuar se përdorimi i teknologjisë duhet të shoqërohet me ofrimin e asistencës njerëzore për personat e moshuar.
Gjatë kësaj dite u prezantuan praktika dhe përvoja nga vende të ndryshme evropiane, me fokus në krijimin e shërbimeve më të qarta, të aksesueshme dhe të integruara për qytetarët.
Dita e dytë e punimeve
Në ditën e dytë të punimeve, diskutimet u përqëndruan në çështje që lidhen me përfshirjen në skemat e pensioneve dhe përmirësimin e procedurave për administrimin e përfitimeve.
Përfaqësimi shqiptar vijoi gjatë programit përmes Ministrisë së Ekonomisë dhe Inovacionit dhe Institutit të Sigurimeve Shoqërore. Z. Astrit Hado, Drejtor i Përgjithshëm i ISSH-së dhe drejtues i institucionit organizator, moderoi sesionin me temë “Përmbushja e nevojave të të vetëpunësuarve dhe punonjësve që operojnë në bujqësi”.
Në këtë kuadër, u trajtua veçanërisht përfshirja e të vetëpunësuarve në bujqësi në skemën e pensioneve, duke marrë në konsideratë specifikat e kësaj kategorie, përshtatjen e procedurave administrative dhe përdorimin e mjeteve dhe programeve elektronike për lehtësimin e përfshirjes së tyre në skemë.
Një tjetër çështje e rëndësishme e diskutuar ishte bashkëpunimi ndërmjet institucioneve të sigurimeve shoqërore dhe institucioneve financiare për realizimin e pagesave të pensioneve, me fokus të veçantë te procesi i kontrollit dhe verifikimit të qenies në jetë të përfituesve. Kjo çështje u trajtua si për pensionistët që marrin pagesat përmes bankave, ashtu edhe për përfituesit që jetojnë jashtë vendit.
Përvojat e prezantuara nga institucionet pjesëmarrëse treguan se praktika e deklarimit një herë në vit, e zbatuar nga ISSH, është në përputhje me praktikat e ndjekura edhe nga institucione homologe evropiane. Në vijim, u diskutua edhe mundësia e përdorimit të zgjidhjeve të reja elektronike për realizimin e këtij procesi, përmes shkëmbimit të të dhënave ndërmjet institucioneve homologe dhe zhvillimit të aplikacioneve që mundësojnë identifikimin e përfituesve nëpërmjet teknologjive biometrike.
Përmbyllja e seminarit
Në përmbyllje të seminarit, drejtuesit e ISSA-s dhe përfaqësuesit e institucioneve pjesëmarrëse vlerësuan bashkëpunimin me ISSH-në, profesionalizmin në organizimin e aktivitetit dhe mikpritjen e ofruar për delegacionet ndërkombëtare.
Seminari shërbeu si një forum për shkëmbimin e përvojave dhe praktikave ndërmjet institucioneve evropiane të sigurimeve shoqërore, duke sjellë në fokus zhvillimin e shërbimeve më moderne, të aksesueshme dhe të përshtatura me nevojat e qytetarëve.
Instituti i Sigurimeve Shoqërore vijon angazhimin për modernizimin dhe digjitalizimin e shërbimeve, në përputhje me standardet evropiane dhe në funksion të përmirësimit të vazhdueshëm të shërbimeve të ofruara për qytetarët dhe përfituesit e skemave të sigurimeve shoqërore.
.