DUKATI I MADH I LUKSEMBURGUT
Më 16 prill 2015 përfundoi procesi i ratifikimit nga Parlamenti Shqiptar i Marrëveshjes, me Ligjin nr. 42/2015 “Për ratifikimin e marrëveshjes ndërmjet Republikës së Shqipërisë dhe Dukatit të Madh të Luksemburgut për mbrojtjen shoqërore”, publikuar në Fletoren Zyrtare me nr. 69, datë 05.05.2015 dhe nga data 01.07.2016, marrëveshja është bërë e zbatueshme për gjithë personat e interesuar.
REPUBLIKA ÇEKE
Në 13 tetor 2015, u nënshkrua marrëveshja kuadër dhe u ratifikua nga Parlamenti Shqiptar me Ligjin nr. 34/2016, datë 24.03.2016 “Për ratifikimin e marrëveshjes ndërmjet Republikës së Shqipërisë dhe Republikës Çeke për mbrojtjen shoqërore”, publikuar në Fletoren Zyrtare me nr. 55, datë 11.04.2016. Nga data 01.02.2017 marrëveshja është bërë e zbatueshme për të gjithë personat e interesuar.
REPUBLIKA FEDERALE E GJERMANISË
Bashkëpunimi me institucionet gjermane është nxitur për faktin se Gjermania është vendi i tretë përsa i përket numrit të emigrantëve shqiptarë.
Marrëveshja u nënshkrua në datën 23 shtator 2015 dhe u ratifikua me Ligjin nr. 23/2016, datë 10.03.2016 “Për ratifikimin e marrëveshjes ndërmjet Republikës së Shqipërisë dhe Republikës Federale të Gjermanisë për mbrojtjen shoqërore dhe të protokollit përfundimtar të saj”, publikuar në Fletoren Zyrtare me nr. 49, datë 01.04.2016. Marrëveshja hyri në fuqi duke filluar nga 01.12.2017. Nga nënshkrimi i kësaj marrëveshjeje do të përfitojnë rreth 19 mijë persona.
REPUBLIKA E AUSTRISË
Marrëveshja dypalëshe në fushën e mbrojtjes shoqërore, ndërmjet Republikës së Shqipërisë dhe Republikës së Austrisë, hyri në fuqi 01.12.2018.
