Marrëveshja bilaterale midis Qeverisë të Republikës së Shqipërisë dhe Qeverisë të Republikës së Turqisë në fushën e Mbrojtjes Shoqërore u ratifikua më 15.05.2003, me Ligjin Nr. 9066, datë 15.05.2003 “Për ratifikimin e Marrëveshjes ndërmjet Qeverisë së Republikës së Shqipërisë dhe Qeverisë së Republikës së Turqisë për Mbrojtjen Shoqërore”.
Kjo Marrëveshje është në fuqi dhe zbatohet nga data 01.02.2005.
Fushat e mbuluara :
Marrëveshja për Mbrojtjen Shoqërore ndërmjet Republikës së Shqipërisë dhe Republikës së Turqisë mbulon:
- sëmundjen dhe barrëlindjen;
- aksidentet në punë dhe sëmundjet profesionale;
- invaliditetin;
- pensionet e pleqërisë;
- pensionet familjare në rast të vdekjes së mbajtësit të familjes;
- përfitimet familjare;
- sigurimin shëndetësor dhe kujdesin shëndetësor.
Marrëveshja zbatohet për kategoritë përkatëse të personave të punësuar, të vetëpunësuarve dhe personave të tjerë ekonomikisht aktivë, sipas legjislacionit të secilës Palë.
Dokumente :
- LIGJ NR. 9066, DATË 15.05.2003 “PËR RATIFIKIMIN E MARRËVESHJES NDËRMJET QEVERISË SË REPUBLIKËS SË SHQIPËRISË DHE QEVERISË SË REPUBLIKËS SË TURIQISË PËR MBROJTJEN SHOQËRORE”- Shkarko në PDF
- MARRËVESHJE E PËRGJITHSHME ADMINISTRATIVE PËR ZBATIMIN E MARRËVESHJES PËR MBROJTJEN SHOQËRORE NDËRMJET QEVERISË SË REPUBLIKËS SË SHQIPËRISË DHE QEVERISË SË REPUBLIKËS SË TURQISË, nënshkruar në Stamboll, më 10 shtator 1998 – Shkarko në PDF
Institucionet kompetente :
Zbatimi i Marrëveshjes kryhet nga institucionet kompetente të Shqipërisë dhe Turqisë, në varësi të llojit të përfitimit.
Në Republikën e Shqipërisë:
- Instituti i Sigurimeve Shoqërore (ISSH), për përfitimet e sigurimeve shoqërore;
- Fondi i Sigurimit të Detyrueshëm të Kujdesit Shëndetësor (FSDKSH), për përfitimet e kujdesit shëndetësor.
Në Republikën e Turqisë:
- Institucioni i Sigurimeve Shoqërore (SGK – Sosyal Güvenlik Kurumu).
Marrëveshja parashikon përdorimin e formularëve të përbashkët për trajtimin e kërkesave për përfitime, verifikimin e periudhave të sigurimit, deklarimin e periudhave të punësimit dhe shkëmbimin e informacionit ndërmjet institucioneve kompetente të Shqipërisë dhe Turqisë.
Formularët e kërkesës për përfitime pensioni në kuadër të Marrëveshjes :
Formularët e mëposhtëm përdoren për paraqitjen e kërkesave për përfitime nga qytetarët, në kuadër të Marrëveshjes për Mbrojtjen Shoqërore ndërmjet Republikës së Shqipërisë dhe Republikës së Turqisë.
- AL – TR 12 – Formulari për pension – Talep – Shkarko në PDF
- AL – TR 20 – Deklaratë për periudhat e punësimit – Shkarko në PDF
Si funksionon procedura?
- Kur personi banon në Shqipëri dhe kërkon një përfitim nga Turqia, kërkesa paraqitet pranë ISSH, duke plotësuar formularin AL/TR 12, së bashku me deklaratën e punësimit AL/TR 20, sipas rastit.
- Kur personi banon në Turqi dhe kërkon një përfitim nga Shqipëria, kërkesa paraqitet pranë institucionit kompetent turk. Formularët përkatës TR/AL, së bashku me deklaratën e punësimit TR/AL 20, plotësohen dhe përcillen nga institucioni kompetent turk tek ISSH
- Institucionet kompetente të Shqipërisë dhe Turqisë shkëmbejnë informacionin e nevojshëm për verifikimin e periudhave të sigurimit dhe shqyrtimin e të drejtës për pension nëpërmjet formularëve AL/TR 3 ose TR/AL3 dhe informacionin mjekësor në rastet e pensioneve të invaliditetit nëpërmjet formularëve AL/TR15 & TR/AL 15.
- Periudhat e sigurimit të kryera në Shqipëri dhe Turqi mund të merren në konsideratë së bashku, kur kjo është e nevojshme për plotësimin e kushteve të përfitimit, në përputhje me dispozitat e Marrëveshjes.
- Secili shtet përcakton dhe paguan pjesën e përfitimit që i takon sipas periudhave të sigurimit të njohura, në përputhje me legjislacionin e vet dhe dispozitat e Marrëveshjes.
- Formularët e tjerë të shkëmbimit të informacionit dhe të komunikimit ndërmjet institucioneve kompetente përdoren gjatë trajtimit të kërkesës dhe nuk përfshihen në formularët që duhet të shkarkojë qytetari.