KANADA

Marrëveshja në fushën e mbrojtjes shoqërore ndërmjet Republikës së Shqipërisë dhe Kanadasë, është ratifikuar me Ligjin 58/2019 “Për ratifikimin e Marrëveshjes për Mbrojtjen Shoqërore ndërmjet Republikës së Shqipërisë dhe Kanadasë”.

Kjo Marrëveshje është në fuqi dhe zbatohet nga data 01.08.2022.

Fushat e mbuluara

Marrëveshja zbatohet për sigurimin shoqëror për:

  • pensionet e pleqërisë;
  • pensionet e invaliditetit;
  • pensionet familjare.

Në Kanada, Marrëveshja zbatohet për Aktin e Sigurimeve për të Moshuarit dhe Planin Kanadez të Pensioneve, ndërsa në Shqipëri për legjislacionin e sigurimit shoqëror të detyrueshëm në lidhje me përfitimet e pleqërisë, invaliditetit dhe familjare.

Dokumente

Institucionet kompetente

Zbatimi i Marrëveshjes kryhet nga institucionet kompetente të përcaktuara nga të dyja Palët.

Në Republikën e Shqipërisë:

  • Instituti i Sigurimeve Shoqërore (ISSH) – për çështjet që lidhen me zbatimin e Marrëveshjes në Shqipëri.

Në Kanada:

  • Divizioni i Operacioneve Ndërkombëtare, Service Canada, Departamenti i Punësimit dhe Zhvillimit Social;
  • Drejtoria e Politikave Legjislative, Agjencia e të Ardhurave të Kanadasë – për çështjet që lidhen me personat e dërguar dhe personat që mbeten subjekt i legjislacionit kanadez gjatë punësimit në Shqipëri.

Formularët e kërkesës për përfitime në kuadër të Marrëveshjes :

Për personat që banojnë në Shqipëri dhe kërkojnë pension kanadez, kërkesa bëhet nëpërmjet portalit të dedikuar dhe formularëve përkatës të Service Canada Për më tepër klikoni në linqet :

Si funksionon procedura ?

  • Kur personi banon në Shqipëri dhe kërkon një përfitim pensioni nga Kanadaja, aplikimi bëhet nëpërmjet portalit të dedikuar të Service Canada, duke plotësuar formularin përkatës sipas llojit të pensionit.
  • Kur personi banon në Kanada dhe kërkon një përfitim pensioni nga Shqipëria, kërkesa paraqitet pranë institucionit kompetent kanadez, duke përdorur formularin përkatës CAN/AL 4, CAN/AL 5 ose CAN/AL 6, dhe dokumentacioni përcillet pranë ISSH-së.
  • Informacioni mbi periudhat e sigurimit dhe njoftimet mbi vendimet shkëmbehen ndërmjet institucioneve kompetente nëpërmjet formularëve AL/CAN 2 dhe CAN/AL 2.
  • Periudhat e sigurimit të kryera në Shqipëri dhe Kanada mund të merren në konsideratë së bashku, kur kjo është e nevojshme për plotësimin e kushteve të përfitimit, në përputhje me dispozitat e Marrëveshjes.
  • Secila Palë përcakton dhe paguan përfitimin që i takon sipas legjislacionit të saj dhe periudhave të sigurimit të njohura në zbatim të Marrëveshjes.