Marrëveshja ndërmjet Republikës së Shqipërisë dhe Rumanisë, është ratifikuar me ligjin 42/2016 “Për ratifikimin e Marrëveshjes ndërmjet Republikës së Shqipërisë dhe Rumanisë për Mbrojtjen Shoqërore”.
Kjo Marrëveshje është në fuqi dhe zbatohet nga data 03.02.2025.
Fushat e mbuluara
Marrëveshja për Mbrojtjen Shoqërore ndërmjet Republikës së Shqipërisë dhe Rumanisë mbulon:
- përfitimet në para për sëmundje;
- përfitimet për barrëlindje;
- përfitimet për aksidente në punë dhe sëmundje profesionale;
- pensionet e pleqërisë, invaliditetit dhe familjare;
- pagesat për vdekje;
- përfitimet në natyrë për sëmundje dhe barrëlindje;
- përfitimet në natyrë dhe në para për aksidente në punë dhe sëmundje profesionale.
Dokumente
- LIGJ Nr. 42/ 2016 “PËR RATIFIKIMIN E MARRËVESHJES NDËRMJET REPUBLIKËS SË SHQIPËRISË DHE RUMANISË PËR MBROJTJEN SHOQËRORE”
- RREGULLORE ADMINISTRATIVE PËR ZBATIMIN E MARRËVESHJES MIDIS REPUBLIKËS SË SHQIPËRISË DHE RUMANISË PËR MBOJTJEN SHOQËRORE, nënshkruar në Bukuresht, më 27 shkurt 2015.
Institucionet kompetente
Zbatimi i Marrëveshjes kryhet nga institucionet kompetente të Shqipërisë dhe Rumanisë, sipas llojit të përfitimit.
Në Republikën e Shqipërisë:
- Instituti i Sigurimeve Shoqërore (ISSH) – për përfitimet në para në lidhje me pensionet e pleqërisë, invaliditetit dhe familjare, sëmundjen, barrëlindjen, aksidentet në punë dhe sëmundjet profesionale;
- Fondi i Sigurimit të Detyrueshëm të Kujdesit Shëndetësor (FSDKSH) – për përfitimet në natyrë të sigurimit të detyrueshëm shëndetësor.
Në Rumani:
- Casa Națională de Pensii Publice (CNPP) – për pensionet, pagesat për vdekje dhe aksidentet në punë e sëmundjet profesionale;
- Casa Națională de Asigurări de Sănătate (CNAS) – për përfitimet në rast sëmundjeje dhe barrëlindjeje dhe përfitimet në natyrë të sigurimit shëndetësor
Kërkesa për përfitim pensioni në kuadër të Marrëveshjes
Për paraqitjen e kërkesës për përfitim pensioni në kuadër të Marrëveshjes përdoret kërkesa për përfitim pensioni.
Si funksionon procedura ?
- Kur personi banon në Shqipëri dhe kërkon një përfitim nga Rumania, kërkesa paraqitet pranë ISSH, duke plotësuar formularin e kërkesës për pension dhe duke paraqitur dokumentacionin përkatës.
- Kur personi banon në Rumani dhe kërkon një përfitim nga Shqipëria, kërkesa paraqitet pranë institucionit kompetent rumun dhe përcillet pranë ISSH-së, sipas procedurave të përcaktuara në Marrëveshje.
- ISSH dhe CNPP/ CNAS shkëmbejnë informacionin e nevojshëm lidhur me kërkesat për përfitime dhe periudhat e sigurimit të kryera në të dyja shtetet.
- Institucionet kompetente shkëmbejnë informacionin dhe dokumentacionin e nevojshëm për verifikimin e të drejtave dhe njoftojnë njëra-tjetrën për vendimmarrjen mbi përfitimin.
- Periudhat e sigurimit të kryera në Shqipëri dhe Rumani mund të merren në konsideratë së bashku, kur kjo është e nevojshme për plotësimin e kushteve të përfitimit, në përputhje me dispozitat e Marrëveshjes.
- Secili shtet përcakton dhe paguan pjesën e përfitimit që i takon sipas periudhave të sigurimit të njohura, në përputhje me legjislacionin e vet dhe dispozitat e Marrëveshjes.