Marrëveshja në fushën e mbrojtjes shoqërore ndërmjet Republikës së Shqipërisë dhe Republikës Federale të Gjermanisë, është ratifikuar me Ligjin nr. 23/2016 “Për ratifikimin e Marrëveshjes ndërmjet Republikës së Shqipërisë dhe Republikës Federale të Gjermanisë për Mbrojtjen Shoqërore dhe të Protokollit Përfundimtar të saj”
Kjo Marrëveshje është në fuqi dhe zbatohet nga data 01.12.2017.
Fushat e mbuluara
Marrëveshja për Mbrojtjen Shoqërore ndërmjet Republikës së Shqipërisë dhe Republikës Federale të Gjermanisë zbatohet për:
- sigurimin e pensionit;
- pensionet e pleqërisë;
- pensionet e invaliditetit;
- pensionet familjare;
- në lidhje me Gjermaninë, edhe për sigurimin shtesë të korporatës së minatorëve dhe pensionin e pleqërisë për bujqit.
Dokumente
- LIGJ Nr. 23/2016 “PËR RATIFIKIMIN E MARRËVESHJES NDËRMJET REPUBLIKËS SË SHQIPËRISË DHE REPUBLIKËS FEDERALE TË GJERMANISË PËR MBROJTJEN SHOQËRORE DHE TË PROTOKOLLIT PËRFUNDIMTAR TË SAJ”.
- MARRËVESHJE ADMINISTRATIVE PËR ZBATIMIN E MARRËVESHJES MBI MBROJTJEN SHOQËRORE NDËRMJET REPUBLIKËS FEDERALE TË GJERMANISË DHE REPUBLIKËS SË SHQIPËRISË.
Institucionet kompetente
Zbatimi i Marrëveshjes kryhet nga institucionet kompetente dhe organizatat ndërlidhëse të të dyja Palëve Kontraktuese.
Në Republikën e Shqipërisë:
- Instituti i Sigurimeve Shoqërore (ISSH).
Në Republikën Federale të Gjermanisë:
- Deutsche Rentenversicherung Rheinland-Pfalz, Speyer;
- Deutsche Rentenversicherung Bund, Berlin;
- Deutsche Rentenversicherung Knappschaft-Bahn-See, Bochum;
- Sozialversicherung für Landwirtschaft, Forsten und Gartenbau, Kassel.
Marrëveshja parashikon përdorimin e formularëve të përbashkët për paraqitjen e kërkesave për pension, deklarimin e periudhave të punësimit, verifikimin e periudhave të sigurimit, shkëmbimin e informacionit mjekësor dhe njoftimin e vendimeve ndërmjet institucioneve kompetente të Shqipërisë dhe Gjermanisë.
Formularët e kërkesës për pension në kuadër të Marrëveshjes
Formularët e mëposhtëm përdoren për paraqitjen e kërkesave për përfitime nga qytetarët, në kuadër të Marrëveshjes për Mbrojtjen Shoqërore ndërmjet Republikës së Shqipërisë dhe Republikës Federale të Gjermanisë.
- AL – DE 1 – Kërkesë për pensionin e të siguruarit (pension pleqërie ose pension invaliditeti) – Antrag auf Versichertenrente – Shkarko në PDF
- Manual shpjegues për plotësimin e formularit ALDE 1 – Erläuterungen zum Ausfüllen des Antrages – Shkarko në PDF
- AL – DE 2 – Kërkesë për pension familjar – Antrag auf Hinterbliebenenrente – Shkarko në PDF
- Manual shpjegues për plotësimin e formularit AL – DE 2 – Erläuterungenzum Ausfüllen des Antrages auf Hinterbliebenenrente – Shkarko në PDF
Si funksionon procedura ?
- Kur personi banon në Shqipëri dhe kërkon një përfitim nga Gjermania, kërkesa paraqitet pranë Institutit të Sigurimeve Shoqërore (ISSH), duke plotësuar AL/DE 1 për pension pleqërie ose invaliditeti, ose AL/DE 2 për pension familjar. Formularët shoqërohen me deklaratën mbi periudhat e punësimit AL/DE 6, sipas rastit.
- Kur personi banon në Gjermani dhe kërkon një përfitim nga Shqipëria, kërkesa paraqitet pranë institucionit gjerman kompetent. Formularët përkatës DE/AL, së bashku me deklaratën e punësimit DE/AL 6, plotësohen dhe përcillen nga institucioni gjerman tek ISSH.
- Institucionet kompetente shkëmbejnë informacionin e nevojshëm për verifikimin e periudhave të sigurimit nëpërmjet formularëve AL/DE 5 dhe DE/AL 5.
- Në rastet e pensioneve të invaliditetit, informacioni mjekësor shkëmbehet nëpërmjet formularëve AL/DE 7 dhe DE/AL 7.
- Periudhat e sigurimit të kryera në Shqipëri dhe Gjermani mund të merren në konsideratë së bashku, kur kjo është e nevojshme për plotësimin e kushteve të përfitimit, në përputhje me dispozitat e Marrëveshjes.
- Secili shtet përcakton dhe paguan pjesën e pensionit që i takon sipas periudhave të sigurimit të njohura, në përputhje me legjislacionin e vet dhe dispozitat e Marrëveshjes.
- Vendimet për pension dhe informacionet përkatëse ndërmjet institucioneve kompetente shkëmbehen nëpërmjet formularëve AL/DE 3 dhe DE/AL 3.